Publicado “Platos de Cadiera”, un recetario en aragonés de cocina altoaragonesa

Pedro Lafuente Pardina (Uesca 1929 – 2000) estió un gran conoixedor d’a cultura altoaragonesa, espezialmén d’o Semontano. En iste libro, “Platos de cadiera. Rezetaria altoaragonesa”, se replegan 75 rezetas publicadas en o Diario de l’Altoaragón en 1992.

 MEJORCONSALUD

Establió o suyo obrador de botería en o corazón d’a ziudat en que naxió y mantenió una estreita relazión con Plasenzia (A Sotonera) de do yera a suya familia. En 1964 prenzipió a colaborar con Radio Huesca, emisora que emitió más de 750 programas baixo o títol “Alto Aragón” en os cuals fabló entre muitas atras cosas de personaches populars (reyals u imachinarios).

Como escritor replegó as tradizions y a luenga d’a Plana de Uesca y o Semontano en cheneral, en obras como Cuentos y romances del Altoaragón (1971), El Altoaragón de tejas abajo (1989), Al calor de la cadiera (1996) y A leer con gusto (2010). En o Diario del Altoaragón publicó numerosas colaborazions, a mayoría d’ellas en forma de romanze que yeran mui asperadas por os leutors.

Estió conzellero d’o Conzello de Uesca (1974-1979), presidén de l’Asociación Provincial de Periodistas Deportivos y miembro de cuantas agrupazions mosicals, asinas como d’o Consello d’a Fabla Aragonesa.

En iste libro se replegan 75 rezetas publicadas en o Diario de l’Altoaragón en 1992 dentro d’o suplemento “La cocina de Huesca. Sobre el arte del buen comer”, de José Manuel Porquet y Pedro Lafuente, en concreto as “Recetas de siempre”, que han estau elaboradas por os mayestros y l’alumnalla en o Zentro Integrau de Formazión Profesional San Lorién (Uesca), y con fotos feitas por Daniel Pardo Calvete, a las cualas s’han uniu atras de Rafel Vidaller, Santiago Cabello y Diane McAndrew y con a edizión, selezión y traduzión de Chusep Raúl Usón en a cuala ha dixau a suya impronta personal.

A publicazión ha estau posible grazias a un convenio de colaborazión entre a Direzión Cheneral de Politica Lingüistica y a Comarca Plana de Uesca con a partizipazión de o Diario de l’Altoaragón.

Deseyamos que istas rezetas d’a cozina tradizional aragonesa dentren en as casas, como dentraban as intervenzions radiofonicas dominicals de Pedro Lafuente, a la familia d’o cual damos as grazias por a zesión desinteresada d’os suyos dreitos.

Y como O botero gosaba dezir en acabar as suyas intervenzions: “A minchar con gusto”. Azede a o libro completo aquí.

AH / JACATIMES